Wednesday, May 13, 2015

பூரணம்

தேடினேன் தொலைந்து போன
என்னை எங்கெங்கும்
காணேன் திகைத்தேன்
நாடினேன் இறைவனை
நழுவினான்
ஓடினேன் குருவிடம்
ஓடினார் எனைவிட்டு
களைத்து ஓய்ந்து
இருந்தேன்
இருப்பதையெல்லாம்
தொலைப்பாயென
அசரீரி கூறியது

பற்றாய் கிடந்த
பாவ புண்ணியமெல்லாம்
அற்றுப் போக அத்தனையும்
தொலத்தேன்
ஆச்சரியம்! ஆச்சரியம்! ஆச்சரியம்!

தேடின, தேவன்
ஓடின குரு அத்தனையும்
நான்! நான்! நான்!

சேர்த்ததோ சேர்ந்ததோ ஏதுமில்லை
தொலைத்ததோ தொலைந்ததோ ஏதுமில்லை

முழுமையே எங்கெங்கும்

-ஸ்ரீ சக்திப்ரியன்

Tuesday, April 7, 2015

தேடல்

தேடினேன் கிடைத்தது
தேடினேன் கிடைக்கவில்லை
கிட்டியதற்கும் கிட்டாததற்கும்
இடைவெளி ஏதுமில்லை
இரண்டும் என்னுள்ளேயே
பூ பார்க்க தலை மறைந்து
தலைப் பார்க்க பூ மறைவது போல்
புரிந்தது
தேடலின் முடிவு
கனவில் தோன்றும் நிஜம்
நிஜத்தில் தோன்றும் கனவு

- ஸ்ரீ சக்திப்ரியன்

Friday, March 27, 2015

ராம நாம மகிமை


ஸ்ரீ ராம ராம ராமேதி ரமே ராமே மனோரமே
ஸஹஸ்ரநாம தத்துல்யம் ராம நாம வராணனே!




ராம:                   ராம நாமம்
ராமேதி:                ராம + இத் = ராமனால்
ரமே:                   வசீகரிப்பது
ராமே:                  ராமனில்
மனோரமே:             மனதை வசீகரிப்பது
ஸஹஸ்ரநாமம்:        விஷ்ணுவின் ஆயிரம் நாமங்கள்
தத்துல்யம்:             சமானமானது
ராம நாம வராணனே:   உயரந்த ராம நாமமே

ராமனால் ராமனில் வசீகரிப்பது ராம நாமமே
இந்த ராம நாமமே விஷ்ணுவின் ஆயிரம் நாமங்களுக்கு சமானமானது.

Tuesday, September 30, 2014

நாணம்

எல்லா தடைகளையும்
கடந்து வந்துவிடுவேன்
உன்னையடைய

என்னை தாண்டித்தான்
வர இயலவில்லை

- ஸ்ரீ சக்திப்ரியன்

Monday, June 16, 2014

அறியும் அறிவு

என்னை நானறிந்ததை
யான் மட்டுமே அறிவேன்
பின்னை எடுத்துரைக்க எதிரே
அன்னியம் யாருமில்லையே!

- ஸ்ரீ சக்திப்ரியன்

Sunday, April 27, 2014

தாகம்

அந்தரங்கமோ
ஆன்மிகமோ
சொந்த அனுபவமே
சுகம்

நீர்!
நீர் குடித்தால்
என் தாகம்
தீராது

-ஸ்ரீ சக்திப்ரியன்

Sunday, March 9, 2014

சுவை

நீ சுவைக்கிறாய்
எனக்கு இனிக்கிறது

உன் தேடலில்
என் இலக்கு

உன் பொக்கிஷம்
என் பெட்டகத்தில்

முத்துக்குளியல் அல்ல
முத்தால் குளியல்

நிறம் மாறும் தருணம்
மூடிய கண்களுக்குள் பலவண்ணம் தெரியும் 

தொடங்குவதற்காக முடிப்போம்
முடிவதற்காக தொடங்குவோம்


-ஸ்ரீசக்திப்ரியன்